Fu un’abbuffata memorabile, dopo la quale tutti cercavano un divano, qualcuno il letto. Ma dopo un po’, fu lo stesso la mezzanotte del 31 dicembre e tutti, con mezzo occhio aperto, riuscirono, in qualche maniera ad alzarsi e guardare i fuochi. “Nuie, avimme sparato sulo ddoie stelletelle”, disse Giggino, rivolto a Rafè “ ’iva verè comm’erano bellilli e‘ ccriature, ca currevene pe tutt’a casa. E mia moglie ca alluccava appriesso a lloro, pecchè se mette paura pure ‘e nu fiammifero!” Poi proseguendo: “Steve pure mio figlio, c’’a mugliera. Chella è di Cervia. Parlanno, parlanno ‘na vota fa: il vostro santo patrono qui è San Catello, vero?” “Si, è overo ricett’io, ma pe nnuie ccà è Santu Catiello”. “Tenimmo ‘o Santo Patrono chhiù bello. Io so’ proprio devoto. Ogni 19 gennaio – disse Rafè – ‘o vaco sempe ‘a ttruvà, e c’appiccia ddoie o tre cannele”. “Nu santo sfortunato, pecchè nun se sape neanche bbuono quando è nato, chi era ‘a famiglia”. “Si però, sapimme ca all’epoca, addirittura r’è bizantini, isso ce steva. E quanno venevano ‘e Longobardi, isso, aiutava ‘a ggente ‘e Castellammare, ca se ne fujeva ncopp’o Faito, pecchè ‘e Longobardi erano fetienti. Catiello cercava pure ‘e liberà ‘a ggenta nosta, prigioniera lloro”. “Bravo, secondo me pure pe cchesto è ‘o protettore d’è furastiere, pecchè quanno isso purtaie ‘a ggente ‘e Castellammare ncopp’o Faito, ca fujeveno r’’a guerra, veneveno pure tanta ata ggente ‘a fora! E isso accuglieva ‘a tutte quante”. “Ieva ‘a prega ncopp’o Faito, c’’o cumpagno, Antonino. e pe cchesto llà ce sta pure ‘a Grotta ca ‘a cchiammano ‘e San Catello. Io chesto saccio”. “Ma è overo ca fuje mise in carcere?” “Si, bbuone nun se sape, ma forse pe ggelusia, o forse pe convenienza, p’affruntà chisti Longobardi, comme vulette ‘o Papa. Ma ‘a terra soia, nun se l’è mai scurdata”. “Addò sta ‘a tomba?” “Quanno murette ‘o cuorpo nun è mai stato truvato. Ma ‘o vonne bbene pure a New York, a San Francisco, a Toronto. Ogni vota ca nasceva ‘na nave, ‘na barca, purtava sempe ‘nu quadro, ‘na statua ‘e Santu Catiello. Pe protezione”. “Siente ma sai quaccosa pure ‘d’’a manna ‘e San Catello?” “Pe paricchie perzone era ‘na specie ‘e profumo ca asceva ‘a rint’o cranio r’’o Santo”. “Ha fatto mai miracule?” “Si l’hanno fatto santo sicuramente. Io saccio ca chillu profumo ‘o purtavano ai malati. Poi salvaie ‘o Cunviento r’’e Gesuiti, quanno facette ‘na forte alluvione, nun me ricordo ll’anno”. “Insomma ’na fatte…”. “E comme no. Per esempio chillo d’’o ggrano”. “Dici…” “Pe vvia ‘e na forte siccità ‘a ggente se mureva ‘e famme. Arrivai ‘na nave carica è grano, e nu bellu viecchio, c’’a barba bianca, iette vicina ‘a chella nave, cu ‘na barchetta e chiedette ‘o capitano, si ce revo chillu ggrano, e ce rette ‘nu bello aniello p’’o convincere. Quanno ‘o capitano aveva vennuto a buon prezzo tutta chella rrobba, ieve cercanno ‘stu viecchio p’’o ringrazià, ma nun ‘o truvava. Accussì uno ‘o purtaie rint’’a cchiesa addò steva ‘a statua e Santu Catiello. ‘O capitano carette in ginocchio, e dicette “ É proprio lui!” “Santu Catiello ce vò bbene a tutte quante, ‘o 19 ‘o vaco ‘a salutà”.
